Act 4 | KYG | STEP | Pita'e Yoni'e'mo ani gemo vaya'aife'mo hapa nepai'age'apae'mo mono hu'a ne'apataya vayanagi alopa mono note'mo kava ne'yagaiya ati vaya'aite'mo yagaino ne'apateya vekagi Satiyusi mono vayanagi hu'a malage hu'a anakaetegamo e'nae.

Acts 4

Pita'e Yoni'e'mo kanisole vaya'ai apaulagale'mo he ti'ana mai'na'age'a anakenoka hu'ana anafi ge'naya gemae

1 Pita'e Yoni'e'mo ani gemo vaya'aife'mo hapa nepai'age'apae'mo mono hu'a ne'apataya vayanagi alopa mono note'mo kava ne'yagaiya ati vaya'aite'mo yagaino ne'apateya vekagi Satiyusi mono vayanagi hu'a malage hu'a anakaetegamo e'nae. 2 Lole apa vekala'moganimo hapa pai'anae'mo, Yesu'mo fali'niyateti'mo ago he ti'niya'mofe'mo muki fali'naya vaya'mo he tigae, hu'ana ali'ana apaya male'na'age'apae'mo hosu apaipamo kali'a anate'nae. 3 Anatete'apae'mo kalavusi hu'ana anate'nae. Yegemo ago lamino falegefe hu'niya'mofe'mo egamo maisa'afe'mo kalavusi hu'ana anate'nae. 4 Ani kava'mo hu'naya'monanafa asole vaya'mogimo ge'amo afite'apae'mo apakesa afi'a fatago hu'nageno hogote vaya'e ani afina'mo apakesa afi'a fatago hu'naya vaya'e'mo napa'apimo faefu tauseni'a vaya'mo mai'nae. 5 Ega'amo Yu vaya'aite'mo yagai'a ne'apataya vayanagi vayatamamo ne'yagaiya vayanagi ke'aepa gemo avo'mo kae'a ali'a apaya ne'malaya vayanagi hu'a Yulusalemu kotegamo magokepi ali'a anupa hu'a mai'nae. 6 Apakaegi Anasi'a mono hu'a ne'apataya vaya'aite'mo yagaino ne'apateya vekagi Kaiyafasi'agi Yoni'agi Alekasana'agi mago'e vayanagi mono hu'a ne'apataya vaya'aite'mo yagai'a ne'apataya vayanagi hu'a ali'a anupa hu'a mai'nae. 7 Mai'ne'apae'mo apa vekala'mo folagapi'mo ali'ana he ti'ana anate'ne'apae'mo, Haiya agufa himamutanileti'e ina la agi'aleti'e'mo ani kava'mo hu'na'ae, hu'a anafi ge'nageno'ae'mo 8 Goti Auneme'amo'mo Pita aipafi'mo haino havai te'nigeno'ae'mo Pita'a ge'apile'mo aeno atagaina huno hapa paino'ae'mo, Ala vaya'mo ne'yagaiya vaya'mogitapa'e vayatama vaya'mogitapa'ene, huno, 9 Lapakaemo alagepa kava'mo huta'a aiyala'mo hosu'niya vekamo alita'a alagepa huta'a ate'no'a kavatefe'mo la'agenoka nehisaya'mo'mo lapakae'e muki Isaleli vaya'mogi'e'mo hisuva gemo afa'a afigae. 10 Inagi afiyo, hu'na, Yesu Kalaisi'a Nasalasa taonifi vekamo himamu'aleti'e agi'aleti'e'mo ani vekamo alita'a alagepa huta'a ate'no'ageno lapaulagale'mo he tino mai'niye. Lapakaemo malipu yosale'mo nili ai'nageno fali'niya'monanafa Goti'a ago alino he tino ate'niye. 11 Goti mukufi gemo'a huno'ae'mo,Lapakaemo yafateti'mo no nekiya vaya'mo mai'netapae'mo mago no'mo nekiya yafafe'mo hutapae'mo, afa yafane, huta hutetapa alita atale'naya'monanafa no'mo nekiya yafa'mo hogote lokiya yafa'mo afole ai'niye, huno avo'mo kae male'niye. 12 Mago alu vekamo'mo lapakufamo alino katino lapatesiya vekamo o'mai'nifa agaeke'mo magokeage mai'niye. Mago alu agi'e vekamo o'mai'niya'mofe'mo Goti'a magoke vekamo agi'amo ma mopafi vaya'mo apami'niyanage'a agimo ae'a ge hisageno hapa maeno, huno hapa pai'niye. 13 Kanisole vaya'mogimo anakayana Pita'e Yoni'e'mo sukulu osu'na'a vekala'mo mai'na'a'monanafa lokiya gefati'mo hu'ana hapa paite'anae'mo koli osu'ana afa'a mai'na'age'apae'mo anakete'anae'mo, ae, hu'a, hogote'ana Yesu'e'mo lokae'ana mai'na'a vekalane, hu'a apakesa afite'a hapau ai'nae. 14 Agayana ali'ana alagepa hu'ana ate'na'a vekamo anakae'e'mo eno magokepi he tino mai'nige'a age'naya'mofe'mo ge'apimo alagi ohane'nige'apae'mo gemo osu'a mai'nae. 15 Inagi anakaefe'mo, kumatega utana lami'ao, hu'a hana paite'apae'mo, 16 Mani vekala'anitegamo na kava hisune, hu'a apakai'api apakai'apimo ge huge afige hu'a mai'nae. Apakaemo hu'apae'mo, Muki Yulusalemu kotega mai'naya vaya'mogimo anake'nage'ana no'agaya agufa lokiya kava'mo hu'na'age'a age'naya'monanafa osu'na'ae, huta afa'a hega o'aegaune. 17 Ani gemo mago'e huno aino atagu ofaesiyafe'mo lokiya gemo huta hana paigune. Halate Yesu agi'amo aetana hapa opai'ao, huta hana paigune, hu'a hu'nae. 18 Hute'a ge hu'nage'ana hai e'ana mai'na'age'apae'mo, Lanakaemo mago'e hutana Yesu agi'amo alagi aetana hapa opaitana alitana apaya o'male'ao, hu'a hana pai'nae. 19 Hu'a hana pai'naya'monanafa Pita'e Yoni'e'mo ge'apile'mo ae'ana atagaina hu'ana hapa pai'anae'mo, La'agaemo Goti ge'amo amagita'a ataleteta'a lapakae gemo akame hisu'a kava'mo'mo Goti aulagale'mo alagepa kavapi hosu kavane. Lapakaitapimo alitapa fako huta lapatetetapa alagepa hutapa lapakesa afiyo. 20 Age'no'a kava'e afi'no'a ge'e'mo hapa paita'a hano hugu'ae, hu'ana hapa pai'na'ae. 21 Kanisole vaya'mogi ani gemo afite'apae'mo anamagigefe hu'nayana muki vaya'mogi afole ai'niya kavafe'mo Goti agi'ale'mo ali'a asaga hu'naya'mofe'mo anakufale'mo mago hosu hanageke ya'mo anamisaya ka'mo o'age'a anatale'nage'ana u'na'ae. 22 Ani ali'ana alagepa hu'ana ate'na'a vekamo'mo foti'a kafugamo aeno agaseno mai'niye.

Apakesa afi'a fatago hu'naya vaya'mogimo, kayamufa huka lato, hu'a nunumu'mo hu'naya gemae

23 Anate'nage'anae'mo Pita'e Yoni'e'mo vaya'anilegamo atagi ne'u'ana mono hu'a ne'apataya vaya'aite'mo yagai'a ne'apataya vaya'e yagai'a ne'apataya vayatama vaya'mogi'e'mo hana pai'naya gemo hapa pai'na'ae. 24 Ani gemo afite'apae'mo magoke apaipa apakesa ali'ne'a Gotife'mo nunumu'mo hu'apae'mo, Ala kava nene, koku'nanagi mopagi solovala aninagi koku'napi hane'niya yanagi ma mopafi hane'niya yanagi solovala anipi hane'niya yanagi huka alo hu'nana vekae, hu'a, 25 Akeya'vilagamo Kaunekame'mo'a laginago vekamo Nevini'a ali'yakamo ne'aliya vekamo avayafati'mo gemo huno'ae'mo,

Na kava hisayafe'mo malaga alu nofi vaya alu nofi vaya'mogimo apavamusamo valete'a apano ae'nae. Apakaemo hu'apae'mo, ma kava'mo hugune, hu'a apakesa afi'naya'monanafa afa'a osu'nae. 26 Ala vaya'e kini vaya'api'e'mo Ala kava netega'e lekana paino ate'niya vekalega'e'mo kame hu'a anatesayafe'mo ali'a anupa hu'a mai'nae,
huno hu'niye. 27 He, lama gemo hu'niye. Heloti'agi Ponitiyasi Pailati'agi alu nofi vayanagi Isaleli vayanagi hu'a ali'yakale'mo lekana paika ate'nanageno mai'neno alagepa kava'age'mo hu'niya vekalegamo kame hu'a atesayafe'mo ali'a anupa hu'a mai'nae. 28 Kagesa afiteka himamukaleti'mo alika afole aika atesanafe'mo hu'nana kava'mo hisayafe'mo ali'a anupa hu'a mai'nae. 29 Ala kava nene, hu'a, Hemenimo lokiya gemo lamagisaya kavafe'mo laha pai'naya gemo afiyo. Afiteka kayamufa huka lategetao ali'yakamo ne'aluna vaya'mogita gekamo aeta hakalo huta hapa paino. 30 Himamukamo alika apave liteka kaita hapau'niya vaya'mo alika hapageka apato. Alagepa kava'age'mo hu'niya vekamo ali'yakamo ne'aliya vekamo Yesu agi'aleti'mo no'agaya lokiya agufa aune kava'mo hisunafe'mo alagepa huka laha mao, hu'a nunumu'mo hu'nae. 31 Nunumu'mo hu'nageno'ae'mo ali'a anupa hu'a mai'naya no'mo'a uti uti ai'niye. Goti Auneme'amo aote Auneme'amo'mo apaipafi'mo haino mai'nige'apae'mo koli osu'a aepa fai'a Goti ge'amo lokiya vai'a ae'a hakalo hu'nae.

Goti mafa'nemogimo magoke apaipa apakesa ali'naya gemae

32 Muki apakesa afi'a fatago nehaya vaya'mogimo magoke apaipa apakesa ali'ne'apae'mo mago vekamo'mo ali'niya yafe'mo, nagai'ni yane, huno osu'nifa muki'amogimo muki ali'naya yafe'mo, lagaiti yane, hu'a hu'nae. 33 Apa vaya'mogimo Ala kava ne'mo Yesu'a fali'niyateti'mo ago he ti'niya kavafe'mo mago'e hu'a himamu'aleti'mo ava gemo hu'nageno'ae'mo Goti'a alagepa huno fiku hapa maeno apami'nige'apae'mo apaki'apile'mo ali'a asaga hu'a apate'nae. 34 Mago'amogimo mopa'api'e no'api'e'mo maketi hu'nage'a miya fai'nage'apae'mo monimo alini e'a apa vaya'mo apami'nage'apae'mo ali'a fako hu'a kagemi ya'apimo ohane'niya vaya'mo apami'nae. 35 Apami'naya'mofe'mo ani vayapati'mo mago vaya'amogimo kafu osu'nae. 36 Magoke vekamo agi'amo Yosefe'a Livai nofi vayapati vekamo Saipalasi ani ago'nanenafi vekamo mai'niye. Apa vaya'mogimo agi'amo Manamasi'ae hu'a ate'nae. Manamasi'ae agimo aepa'amo ina kava'mo huno alino lokiya vaino ne'apateya vekae. 37 Agae mopamo maketi hu'nige'a miya fai'nageno monimo alinineno apa vaya'mo apami'niye.